ஈப்போ, அக். 19 – மக்களின் நலனைக் கருத்தில் கொண்டு, மக்கள் பிரதிநிதிகள் உயர் தரத்திலான சேவைகளை வழங்குவதை உறுதிசெய்யும் வகையில் ஜசெக பேராக் தலைமைத்துவம் நிர்ணயித்துள்ள செயல்திறன் இலக்குகளை மாலிம் நாவார் சட்டமன்ற உறுப்பினர் ஷாஷா வீரய்யா வரவேற்றுள்ளார்.
மக்கள் பிரதிநிதிகளின் செயல்திறன் மற்றும் பொறுப்புணர்வை உறுதிப்படுத்தும் கட்சித் தலைமையின் இந்த நடவடிக்கை, வெளிப்படைத்தன்மை மற்றும் நேர்மையுடன் சிறந்த சேவைகளை வழங்குவதில் ஜசெக கொண்டுள்ள உறுதிப்பாட்டை வெளிப்படுத்துவதாக அவர் குறிப்பிட்டார்.
இந்த இலக்குகளை எதிர்கொள்ள மாலிம் நாவார் சட்டமன்றத் தொகுதியின் தனது சேவை அணியினர் முழுமையாகத் தயாராக இருப்பதாகக் கூறிய அவர், மக்களுக்கான சேவைகளைத் தொடர்ந்து சிறப்பாக வழங்குவதிலும், அரசியல் நிலைத்தன்மையைப் பேணுவதிலும் தமது முழுமையான அர்ப்பணிப்பை வெளிப்படுத்தினார்.
“மக்கள் பிரதிநிதி என்ற முறையில், இந்தத் தீர்மானத்தை நான் நேர்மறையான ஒன்றாகவே பார்க்கிறேன். இது களத்தில் இன்னும் தீவிரமாகப் பணியாற்றுவதற்கான ஊக்கமாக அமையும். மக்கள் நம் மீது வைத்துள்ள நம்பிக்கையை நேரடிச் சேவைகள் மற்றும் அளவிடக்கூடிய சாதனைகள் மூலம் நாம் மெய்ப்பிக்க வேண்டும்,” என்று அவர் தெரிவித்தார்.
இதனிடையே, பேராக் மாநிலத்தில் ஜசெகவுக்கும் ஒற்றுமை அரசாங்கத்தின் கூட்டணிக் கட்சிகளுக்கும் இடையே நிலவும் நல்லிணக்கம் மற்றும் வலுவான ஒத்துழைப்பு குறித்தும் அவர் நம்பிக்கை தெரிவித்தார்.
கூட்டணிக் கட்சிகளுக்கு இடையிலான சுமுகமான உறவும் பரஸ்பர மரியாதையும் பேராக் மாநிலத்தின் அரசியல் நிலைத்தன்மைக்கு அடித்தளமாக இருப்பதாக அவர் சுட்டிக்காட்டினார்.
இதன் மூலம், ‘பேராக் செழிப்பான மாநிலம் 2030’ (Perak Sejahtera 2030) திட்டம் மற்றும் மடானி அரசாங்கத்தின் பல்வேறு முன்னெடுப்புகளைத் தடையின்றியும் திறம்படவும் செயல்படுத்தி, அனைத்துத் தரப்பு மக்களும் பயனடைவதை உறுதிசெய்ய முடியும் என்றும் அவர் கூறினார்.
மாலிம் நாவார் தொகுதி மக்கள் தமக்கு வழங்கியுள்ள மக்கள் சேவைப் பொறுப்பைத் தொடர்ந்து அர்ப்பணிப்புடன் நிறைவேற்றுவதோடு, பேராக் மாநில அரசாங்கத்தின் நிர்வாகம் வலுவாகத் தொடர கூட்டணிக் கட்சிகளுடன் நெருக்கமாக இணைந்து பணியாற்றப்போவதாகவும் ஷாஷா வீரய்யா உறுதியளித்தார்.