கோலாலம்பூர், அக்.20-
மலேசிய மாணவர்கள் கால்நடை மருத்துவத் துறையில் உயர்கல்வி பயில்வதற்கான வாய்ப்புகளை விரிவுபடுத்தும் வகையில், இந்தோனேசியாவின் IPB பல்கலைக்கழகத்துடன் Goon International College கல்வி ஒப்பந்தம் ஏற்படுத்தியுள்ளதாக அதன் இயக்குநர்களில் ஒருவரான பிரபாகரன் பெருமாள் தெரிவித்தார்.
இந்தக் கல்வி ஒத்துழைப்பின் மூலம், கால்நடை மருத்துவத் துறையில் ஆர்வமுள்ள மாணவர்கள் தங்களது உயர்கல்விக் கனவை நனவாக்குவதற்குப் புதிய பாதை உருவாகியுள்ளதாக அவர் கூறினார்.
“விலங்குகளின் ஆரோக்கியம், கால்நடைப் பண்ணைகளின் மேம்பாடு, உணவுப் பாதுகாப்பு ஆகியவற்றில் கால்நடை மருத்துவர்களின் பங்களிப்பு இன்றியமையாதது. இத்துறையில் பயில விரும்பும் மாணவர்களுக்குக் கூடுதல் கல்வி வாய்ப்புகளை ஏற்படுத்துவதே இந்த ஒத்துழைப்பின் நோக்கமாகும்” என்று அவர் தெரிவித்தார்.
12 லட்சம் வெள்ளி கல்வி உதவித்தொகை
இதனிடையே, 2027ஆம் ஆண்டு மாணவர் சேர்க்கையை முன்னிட்டு, மொத்தம் 12 லட்சம் வெள்ளி மதிப்பிலான கல்வி உதவித்தொகைகளை Goon International College வழங்கவுள்ளதாகவும் பிரபாகரன் கூறினார்.
அறிவியல் அடிப்படைப் படிப்பான ‘Foundation in Science’ பாடநெறியில் சேரத் தகுதியுள்ள மாணவர்களுக்கு இந்த உதவித்தொகைகள் வழங்கப்படவுள்ளன. சபா, சரவாக் உள்ளிட்ட மலேசியாவின் அனைத்து மாநிலங்களைச் சேர்ந்த மாணவர்களும் இந்த வாய்ப்பைப் பயன்படுத்திக்கொள்ளலாம் என்று அவர் குறிப்பிட்டார்.
பொருளாதாரச் சிரமங்களால் மாணவர்கள் தங்களது கல்விக் கனவைக் கைவிடக்கூடாது என்பதே இந்த உதவித்தொகைத் திட்டத்தின் முக்கிய நோக்கம் என்றும் அவர் வலியுறுத்தினார்.
தகுதி நிபந்தனைகளுக்கு உட்பட்டு சேர்க்கை
2027ஆம் ஆண்டுக்கான இந்தக் கால்நடை மருத்துவக் கல்விப் பாதையில் சேர விரும்பும் மாணவர்கள், IPB பல்கலைக்கழகம் நிர்ணயித்துள்ள கல்வித் தகுதிகள் மற்றும் தேர்வு நடைமுறைகளைப் பூர்த்தி செய்ய வேண்டும்.
பட்டத்தின் அங்கீகாரம் தொடர்பாக, மலேசியத் தகுதி முகமையான MQA-வின் அங்கீகார நடைமுறைகளுக்கு உட்பட்டு, IPB பல்கலைக்கழகத்தின் கால்நடை மருத்துவப் பட்டம், மலேசிய புத்ரா பல்கலைக்கழகத்தின் (UPM) கால்நடை மருத்துவப் பட்டத்திற்கு இணையானதாக அங்கீகரிக்கப்பட்டுள்ளதாகக் கல்லூரி வெளியிட்ட தகவலில் தெரிவிக்கப்பட்டுள்ளது.
மலேசியாவில் கால்நடை மருத்துவராகப் பணியாற்றுவதற்கான தொழில்முறைப் பதிவு, சம்பந்தப்பட்ட அங்கீகார மற்றும் பதிவு நிபந்தனைகளைப் பூர்த்தி செய்வதற்கு உட்பட்டது என்றும் தெரிவிக்கப்பட்டுள்ளது.
இந்தக் கல்வி ஒத்துழைப்பு, மாணவர்களின் உயர்கல்வி வாய்ப்புகளை விரிவுபடுத்துவதுடன், கால்நடை மருத்துவத் துறைக்குத் தேவையான திறமையான நிபுணர்களை உருவாக்கவும் உதவும் என்று பிரபாகரன் பெருமாள் நம்பிக்கை தெரிவித்தார்.