பாஸ்டன்: ஜூன் 30-
ஃபிஃபா உலகக் கிண்ண கால்பந்து தொடரில் 4 முறை உலக சாம்பியனான ஜெர்மனி வெளியேறி இருப்பது, உலக கால்பந்து ரசிகர்களை அதிர்ச்சி அடைய வைத்துள்ளது.
பல தசாப்தங்களாக உலகக் கோப்பை தொடர்களில் ஜெர்மனி எவ்வாறு ஆதிக்கம் செலுத்துகிறது என்பதை அறிய முடியும்.
இதற்கு காரணம், பெனால்டி ஷூட்-அவுட் (Penalty Shootout) முறை என்று வந்தால் அதில் ஜெர்மனி கிங். . இதில் ஜெர்மனி கடந்த நாற்பது ஆண்டுகளுக்கும் மேலாக தோல்வியே சந்திக்காத ஒரு அசைக்க முடியாத சாதனையைத் தக்க
வைத்திருந்தது.
ஆனால், அந்தப் பெருமைமிகு சாதனை இன்றுடன் முடிவுக்கு வந்தது.
பாஸ்டன் மைதானத்தில் நடைபெற்ற Round of 32 ஆட்டத்தில் ஜெர்மனி மற்றும் பராகுவே அணிகளுக்கு இடையிலான விறுவிறுப்பான 120 நிமிட ஆட்டம் 1-1 என்ற கோல் கணக்கில் சமனில் முடிந்தது.
இதைத் தொடர்ந்து நடைபெற்ற பெனால்டி ஷூட்-அவுட்டில் பராகுவே அணி 4-3 என்ற கணக்கில் ஜெர்மனியை வீழ்த்தியது.
இதன் மூலம் நான்கு முறை உலக சாம்பியனான ஜெர்மனி, உலகக் கோப்பை வரலாற்றில் தனது முதல் பெனால்டி ஷூட்-அவுட் தோல்வியைத் தழுவியதன் மூலம், உலகக் கோப்பையின் மிக நீண்ட சாதனைகளில் ஒன்று முடிவுக்கு வந்துள்ளது.
கடந்த 44 ஆண்டுகளாகத் தங்களது பெனால்டி ஷூட்-அவுட் வரலாற்றில் தோல்வியே காணாத அசைக்க முடியாத பெருமையுடன் ஜெர்மனி இப்போட்டிக்குள் நுழைந்தது.
அவர்களின் இந்த சாதனைப் பயணம் 1982 ஆம் ஆண்டு பிரான்ஸ் அணிக்கு எதிரான உலகக் கோப்பை அரையிறுதி ஆட்டத்திலிருந்து தொடங்கியது. கூடுதல் நேர முடிவில் 3-3 என ஆட்டம் சமனானதைத் தொடர்ந்து, பெனால்டி ஷூட்-அவுட்டில் மேற்கு ஜெர்மனி 5-4 என்ற கணக்கில் வெற்றி பெற்று இறுதிப் போட்டிக்கு முன்னேறியது.
அந்த போட்டியில் உலி ஸ்டீலிகே (Uli Stielike) அடித்த பெனால்டி ஷாட்டை பிரான்ஸ் கோல்கீப்பர் ஜீன்-லூக் எட்டோரி தடுத்தார்.
உலகக் கோப்பை பெனால்டி ஷூட்-அவுட்டில் ஜெர்மனி வீரர் ஒருவர் தவறவிட்ட ஒரே பெனால்டி இதுவாக மட்டுமே இருந்தது.
இந்த ஒரு தவறைத் தவிர, அடுத்த நான்கு தசாப்தங்களாக ஜெர்மனியின் சாதனைப் பயணம் தடையின்றித் தொடர்ந்தது. 1986 உலகக் கோப்பையின் கால்இறுதியில் மெக்சிகோவை 4-1 என்ற கணக்கிலும், 1990 உலகக் கோப்பை அரையிறுதியில் இங்கிலாந்தை 4-3 என்ற கணக்கிலும் ஜெர்மனி பெனால்டி ஷூட்-அவுட்டில் வீழ்த்தியது.
இவர்களின் நான்காவது பெனால்டி வெற்றி 2006 உலகக் கோப்பையில் அர்ஜென்டினாவுக்கு எதிராக 4-2 என்ற கணக்கில் பெர்லினில் கிடைத்தது.
1982 இல் ஸ்டீலிகே தவறவிட்ட பெனால்டிக்கும், 2026 ஆம் ஆண்டின் இந்த ஆட்டத்திற்கும் இடைப்பட்ட காலத்தில், உலகக் கோப்பை பெனால்டி ஷூட்-அவுட்களில் ஜெர்மனி வீரர்கள் அடித்த ஒவ்வொரு பெனால்டியும் கோலாகவே மாறியிருந்தது குறிப்பிடத்தக்கது.
இன்று
பராகுவே அணிக்கு எதிரான கடினமான ஆட்டத்திற்குப் பிறகும், ஜெர்மனி தனது பாரம்பரிய வெற்றியைத் தொடரும் என்றே எதிர்பார்க்கப்பட்டது.
ஆட்டத்தில் 75 சதவீத பந்துக் கட்டுப்பாட்டை ஜெர்மனி வைத்திருந்ததுடன், 92 சதவீத துல்லியத்துடன் 753 பாஸ்கள் மற்றும் 21 ஷாட்டுகளை அடித்தது. ஆனால், பராகுவே அணியின் கோல்கீப்பர் ஆர்லாண்டோ கில் மற்றும் அவர்களின் பலமான தற்காப்பு ஆட்டம் ஜூலியன் நாகெல்ஸ்மேனின் ஜெர்மனி அணிக்கு முட்டுக்கட்டை போட்டது.
ஆட்டத்தின் 42ஆவது நிமிடத்தில், மத்தியாஸ் பாஸை பெற்று ஜூலியோ என்சிசோ தலையால் முட்டி கோல் அடிக்க, பராகுவே அதிர்ச்சி முன்னிலை பெற்றது.
பின்னர் 54ஆவது நிமிடத்தில் காய் ஹாவர்ட்ஸ் (Kai Havertz) தலையால் முட்டி கோல் அடித்து ஆட்டத்தைச் சமன் செய்தார்.
கூடுதல் நேரத்தின் 102ஆவது நிமிடத்தில் கார்னர் கிக் மூலம் ஜொனாதன் தா (Jonathan Tah) கோல் அடித்தார். ஆனால் விஏஆர் (VAR) சோதனையில் வால்டேமர் ஆண்டன் கோல்கீப்பர் ஆர்லாண்டோ கில்லை சட்டவிரோதமாகத் தடுத்தது கண்டறியப்பட்டு அந்தக் கோல் மறுக்கப்பட்டது.
120 நிமிட ஆட்ட நேர முடிவிலும் இரு அணிகளும் சமநிலையில் இருந்ததால், ஆட்டம் பெனால்டி ஷூட்-அவுட்டுக்குச் சென்றது.
அங்கு ஜெர்மனியின் அசைக்க முடியாத ஆயுதம் அவர்களைக் கைவிட்டது. ஜெர்மனியின் முதல் பெனால்டி வாய்ப்பை காய் ஹாவர்ட்ஸ் தவறவிட, அதனை ஆர்லாண்டோ கில் தடுத்தார்.
பராகுவே தரப்பில் மொரிசியோ முதல் கோலை அடித்தார். ஜோசுவா கிம்மிச், ஜமால் முசியாலா மற்றும் நாடீம் அமிரி ஆகியோர் ஜெர்மனிக்காகக் கோல் அடித்த
போதிலும், நிக் வோல்டெமேடே அடித்த ஷாட்டை கில் தடுத்தார்.
இறுதியாக ஜொனாதன் தாவின் வாய்ப்பும் நழுவப்போனது. பராகுவேவின் ஜோஸ் கனாலே தனது பெனால்டி வாய்ப்பைச் சரியாகப் பயன்படுத்தி 4-3 என்ற கணக்கில் வரலாற்று வெற்றியை உறுதி செய்தார்.