மலாக்கா, நவ.15 – தஞ்சோங் பிடாரா சட்டமன்ற உறுப்பினர் டத்தோஸ்ரீ டாக்டர் அப்துல் ரவூப் யூசோ, மலாக்காவின் 13-ஆவது முதலமைச்சராக இரண்டாவது தவணையாக இன்று பதவியேற்றுக் கொண்டார்.
65 வயதான அப்துல் ரவூப், ஆயர் கெரோவில் உள்ள ஆளுநர் அலுவலகத்தில் இன்று நண்பகல் 12.10 மணியளவில் மலாக்கா ஆளுநர் துன் முகமட் அலி முகமட் ருஸ்தாம் முன்னிலையில் பதவிப் பிரமாணம் செய்து கொண்டார்.
இந்நிகழ்வில் துணைப் பிரதமரும் தேசிய முன்னணியின் (BN) தலைவருமான டத்தோஸ்ரீ டாக்டர் அஹ்மட் சஹிட் ஹமிடி உள்ளிட்ட அரசியல் தலைவர்களும், மாநிலத் தேர்தலில் வெற்றி பெற்ற சட்டமன்ற உறுப்பினர்களும் கலந்து கொண்டனர்.
இதனிடையே, நேற்று நடைபெற்ற 16-ஆவது மலாக்கா மாநிலத் தேர்தலில் அப்துல் ரவூப் தஞ்சோங் பிடாரா தொகுதியைத் தக்கவைத்துக் கொண்டார். பக்காத்தான் ஹராப்பான் வேட்பாளர் யுனாஸ்ரி முஸ்தமிரியை 8,615 வாக்குகள் பெரும்பான்மையில் தோற்கடித்தார்.
இந்தத் தேர்தலில் தேசிய முன்னணி 21 இடங்களையும், பெரிக்காத்தான் நேஷனல் மூன்று இடங்களையும் கைப்பற்றின. பக்காத்தான் ஹராப்பான் நான்கு இடங்களில் வெற்றி பெற்றது.
இதன் மூலம் BN–PN கூட்டணி மூன்றில் இரண்டு பங்குக்கும் அதிகமான பெரும்பான்மையுடன் மலாக்கா மாநில அரசாங்கத்தை அமைத்துள்ளது.