ஆயர் கெரோ: நவ 8-
ஒருவர் இதற்கு முன்பு மக்கள் பிரதிநிதியாகப் பதவி வகிக்கவில்லை என்பதற்காக, அவர் அரசியலில் அனுபவம் இல்லாதவர் என்று கருதிவிட முடியாது என முன்னாள் மலாக்கா முதலமைச்சர் டத்தோஸ்ரீ அட்லி சஹாரி தெரிவித்துள்ளார்.
ஒரு வேட்பாளரின் திறமையை மதிப்பிடும்போது, அரசியல் அனுபவம் மட்டுமின்றி, சமூகப் பணிகளில் அவர் ஆற்றிய பங்களிப்பையும் கருத்தில் கொள்ள வேண்டும் என்று அவர் கூறினார்.
சில வேட்பாளர்கள் முதன் முறையாகத் தேர்தலில் போட்டியிடுவதற்கு முன்பே பல ஆண்டுகளாக அரசியலிலும், சமூக சேவைகளிலும் ஈடுபட்டு வந்திருக்கலாம் என்றும் அவர் குறிப்பிட்டார்.
Astro AWANI செய்தி நிறுவனத்திற்கு அண்மையில் வழங்கிய நேர்காணலில் அவர் கூறியதாவது:
“சில நேரங்களில் புதிய வேட்பாளர்களுக்கு முன்பிருந்த மக்கள் சேவைப் பதிவுகள் இல்லாமல் இருக்கலாம். ஆனால், நானும் ஆரம்பத்தில் ஒரு புதிய வேட்பாளராகத்தான் இருந்தேன்.
“இருப்பினும், முதலமைச்சராகப் பொறுப்பேற்பதற்கு முன்பே 25 ஆண்டுகளாக அரசியலில் ஈடுபட்டிருந்தேன். அதாவது, மக்கள் பிரதிநிதியாக இருந்தாலும் இல்லாவிட்டாலும், மக்களுக்கு எவ்வாறு சேவையாற்ற வேண்டும் என்ற அனுபவம் எனக்கு இருந்தது,” என்றார்.
மேலும், அரசு சாரா அமைப்புகள் (NGO) மற்றும் அரசியல் நடவடிக்கைகளில் ஒருவரின் ஈடுபாடும் அவரது மக்கள் சேவைக்கான அனுபவத்தை வெளிப்படுத்தும் முக்கிய அம்சங்களாகும் என்று டத்தோஸ்ரீ அட்லி விளக்கினார்.
ஒரு வேட்பாளரின் அனுபவத்தை அவர் இதற்கு முன்பு வகித்த பதவிகளின் அடிப்படையில் மட்டும் மதிப்பிடக் கூடாது என்றும் அவர் வலியுறுத்தினார்.
இதற்கிடையில், அரசியலில் பணம் கொடுத்து வாக்குகளைப் பெறும் நடைமுறை குறித்தும் டத்தோஸ்ரீ அட்லி கருத்துத் தெரிவித்தார்.
பணம் கொடுக்கும் நடவடிக்கைகள் வாக்காளர்களின் முடிவுகளைப் பாதிக்கக் கூடாது என்றும் அவர் கூறினார்.
எந்தவொரு தரப்பினரையும் நேரடியாகக் குறிப்பிடாமல் பேசிய அவர், தற்காலிகமாக வழங்கப்படும் பணம், நீண்டகால வளர்ச்சிக்கான கொள்கைகளுக்கு மாற்றாக அமைய முடியாது என்று தெரிவித்தார்.
“ஜனநாயகம் அந்த நிலைக்குச் சென்றுவிடக் கூடாது. நாம் வாக்களிக்கும்போது, வழங்கப்படும் RM200 தொகை ஐந்து ஆண்டுகளுக்கு நீடிக்கப் போவதில்லை என்பதைச் சிந்திக்க வேண்டும்.
“ஆனால், மிக முக்கியமானது உருவாக்கப்படும் கொள்கைகள்தான்,” என்றும் அவர் கூறினார்.
தற்போது புக்கிட் கட்டில் சட்டமன்ற உறுப்பினராக இருக்கும் அட்லி சஹாரி, நவம்பர் 14ஆம் தேதி நடைபெறவுள்ள மலாக்கா மாநிலத் தேர்தலில் மூன்றாவது முறையாக அதே தொகுதியில் போட்டியிட்டு தனது இடத்தைத் தக்கவைக்க முயற்சிக்கிறார்.
இம்முறை மலாக்கா மாநிலத் தேர்தலில் போட்டியிடும் பக்கத்தான் ஹரப்பானின் புதிய முகங்களில் முகமது முக்லிசுல் முபின் ஜூலாசபியா (கோலா லிங்கி), ஜேசன் சே-சி நாதன் (பெங்காலான் பத்து), முகமது ஹக்கிமின் மொக்தார் (ஆயர் மொலெக்) மற்றும் பூ லோங் சுவான் (டுயோங்) ஆகியோர் அடங்குவர்.