இரண்டே ஆண்டுகளில் மலேசிய மறுசுழற்சி சங்கம் உலக மட்டத்தில் புதிய அடையாளம்!

கோலாலம்பூர் ஏப்ரல் 28-
2023ஆம் ஆண்டு உருவாக்கப்பட்ட மலேசிய மறுசுழற்சி சங்கம் (MRA), இரண்டே ஆண்டுகளில் நாட்டின் மறுசுழற்சி துறையை வலுப்படுத்தும் முக்கிய சக்தியாக வளர்ந்து, உலகத் தளத்திற்கே இடம் பெயர்ந்துள்ளது.

30 ஆண்டுகளுக்கு மேலான அனுபவமுள்ள மறுசுழற்சி துறை நிபுணரான தலைவர் டத்தோ ஜோ சரவணன் தலைமையில், இந்த அமைப்பு துறையின் எதிர்கால வளர்ச்சிக்கான புதிய தரநிலைகளை நிறுவி வருகிறது.

உலகத் தொடர்பை விரிவுபடுத்த, மற்றும் சுற்றுச்சூழல் பாதுகாப்பையும், மறுசுழற்சி பொருளாதாரத்தையும் வலுப்படுத்தும் நோக்குடன் உருவாக்கப்பட்ட மலேசிய மறுசுழற்சி சங்கம் மலேசியாவின் ஒருங்கிணைந்த ஒற்றுமையையும் பிரதிபலிக்கும் பன்முகத்தன்மையுள்ள குழுவினால் முன்னின்று நடத்தப்படுகிறது என்று அவர் சொன்னார்.

மலேசிய மறுழற்சி சங்கம் உலக அளவில் முன்னோடியான கொள்கைகளை ஆதரித்து தொழில்நுட்ப பயிற்சிகளை வழங்குகிறது,

மக்களிடையே பசுமை மறுசுழற்சி பற்றிய விழிப்புணர்வை ஏற்படுத்துகிறது என்று ஊடகத்துக்கு வழங்கிய சிறப்பு நேர்காணலில் அவர் இதனை தெரிவித்தார்.

“நாம் மலேசியாவை உலக மறுசுழற்சி துறையில் மதிப்பிற்குரிய மற்றும் போட்டியிடக்கூடிய நாடாக உருவாக்க வேண்டும்.

மறுசுழற்சி என்பது வெறும் கழிவுகளை நிர்வகிப்பது அல்ல; எதிர்காலம் நோக்கிய பசுமை பொருளாதாரத்தை உருவாக்கும் செயல்,” என்று அவர் வலியுறுத்தினார்.

MRA-வின் பன்முக குழு, மலேசியாவின் பல்வகை தன்மையின் சிறந்த எடுத்துக்காட்டு.

இதன் மூலம் உள்நாட்டு மற்றும் உலகளாவிய நடவடிக்கைகள் விரைவாகவும் ஒருங்கிணைந்த முறையிலும் நடைபெறுகிறது.

உலகளாவிய விரிவாக்க முயற்சியாக, MRA பல முக்கிய உலக மறுசுழற்சி அமைப்புகளுடன் ஒப்பந்தங்கள் (MOU) கையெழுத்திட்டுள்ளது.

இந்தியாவின் Material Recycling Association of India (MRAI), அமெரிக்காவின் Recycled Materials Association (ReMA) (முன்பு ISRI), மத்திய கிழக்கு பகுதியின் Bureau of Middle East Recycling (BMR)
, ஐரோப்பாவின் Bureau of International Recycling (BIR) இதில் அடங்கும்.

இந்த ஒப்பந்தங்கள் MRA-வின் Network பலப்படுத்துவதோடு, புதிய சந்தைகளையும் திறக்க உதவுகின்றன.

முன்னோக்கி பார்ப்பதில், European Recycling Industries’ Confederation (EuRIC) உடனும் ஓர் ஒப்பந்தத்தை MRA கையெழுத்திடத் திட்டமிட்டுள்ளது.

இது மலேசிய மறுசுழற்சி துறையின் ஐரோப்பிய சந்தை பங்கேற்பை பெருக்கும்.

உள்நாட்டில், MRA முக்கிய அரசாங்க அமைச்சுகள் மற்றும் அமைப்புகளுடன் நெருங்கிய ஒத்துழைப்பை மேற்கொள்கிறது:

முதலீடு, வர்த்தகம் மற்றும் தொழில் அமைச்சு (MITI),
மலேசிய வெளிநாட்டு வர்த்தக மேம்பாட்டு நிறுவனம் (MATRADE),
மலேசிய ஸ்டீல் நிறுவனம் (MSI)
மூலம், மறுசுழற்சி துறைக்கு தேவையான கொள்கை ஆதரவை உறுதி செய்கிறது.

MRA-வின் வேகமான முன்னேற்றத்தை பற்றிச் சிந்திக்கும்போது,
மறுசுழற்சி என்பது வெறும் சுற்றுச்சூழல் மட்டுமல்ல , இது பொருளாதார மாற்றத்தின் ஒரு ஊக்கியாகும் என்று டத்தோ ஜோ சரவணன் தெரிவித்தார்.

மறுசுழற்சியில் முதலீடு செய்வது என்பது வேலை வாய்ப்புகள், புதுமைகள் மற்றும் மலேசியாவின் நிலைத்த எதிர்காலத்தில் முதலீடு செய்வதையே பொருள்படும் என்று அவர் தமது பேட்டியில் சுட்டிக் காட்டினார்.