மாணவி கொலை செய்யப்பட்ட சம்பவத்தில் குற்றவாளிகளுக்கு தக்க தண்டனை கிடைக்க வேண்டும் – டத்தோ டாக்டர் லோகபாலா

கோலாலம்பூர் ஜூன் 26-
சைபர் ஜெயா தங்கும் விடுதியில் 20 வயது பல்கலைக்கழக மாணவி கொலை செய்யப்பட்ட சம்பவம் மிகவும் வேதனையளிக்கிறது, இதயத்தை உடைக்கிறது என்று பிபிபி கட்சியின் தேசிய தலைவர் டத்தோ டாக்டர் லோகபாலா தெரிவித்தார்.

இந்த செய்தி நாடு முழுவதும் அதிர்ச்சி அலைகளை ஏற்படுத்தியுள்ளது. எந்த நாகரிக சமூகமும் இத்தகைய கொடுமைகள் நிகழ்வதை அனுமதிக்க மாட்டார்கள்

நாட்டின் எந்தப் பகுதியிலும் பெண்களுக்கு எதிரான கொடூரத்தைப் பற்றி கேள்விப்படும்போது நான் மிகவும் வேதனையடைகிறேன்.

பெண்களுக்கு எதிரான இதுபோன்ற கொடூரங்களுக்கு ஒட்டு மொத்த சமுதாயமும் குரல் கொடுக்க வேண்டும். இந்தக் கொலை தொடர்பாக கல்வி நிறுவனங்களின் பாதுகாப்பு நிலை குறித்து கேள்வி எழுந்துள்ளது.

அது பொது அல்லது தனியார் என எதுவாக இருந்தாலும், ஒவ்வொரு கல்வி நிறுவனத்திலும் பாதுகாப்பு நிலை குறித்து அரசாங்கம் உடனடியாக ஆய்வுகளை மேற்கொள்ள வேண்டிய நேரம் இது.

மாணவர்கள் மற்றும் குடியிருப்பாளர்களின் பாதுகாப்பை உறுதி செய்ய அரசாங்கம் விரிவான பாதுகாப்பு நடவடிக்கைகளை எடுக்க வேண்டும்.

இந்த விரிவான பாதுகாப்பு நடவடிக்கைகளில் சிசிடிவி மற்றும் உள்ளேயும் வெளியேயும் நடமாட்டத்தைக் கண்காணிக்க காவலர்களை கட்டாயமாக நிறுவுவதும் அடங்கும்.

குற்றவாளிகளை நீதியின் முன் நிறுத்தி உடனடியாக விசாரணை நடத்த வேண்டும் என்றும் நான் காவல்துறையை வலியுறுத்துகிறேன்.

இது ஒரு கடுமையான குற்றம், குற்றவாளிகள் தண்டிக்கப்படாமல் போகக்கூடாது.
பாதிக்கப்பட்டவரின் குடும்பத்தினருக்கு எனது ஆழ்ந்த இரங்கலை தெரிவித்துக் கொள்கிறேன் என்று அவர் சொன்னார்.