கோலாலம்பூர், டிச 11- காவல் நிலையங்கள் மற்றும் பிற முன்னணி அரசு அலுவலகங்களுக்கான ஆடை விதிகள் விரைவில் திருத்தப்படும் என தொடர்பு அமைச்சரும் அரசாங்கப் பேச்சாளருமான டத்தோ ஃபஹ்மி ஃபட்சில் தெரிவித்தார்.
காவல் நிலையத்தில் புகார் அளிப்பதில் எவரும் தடுக்கப்படக் கூடாது என்பதில் பிரதமர் அன்வார் இப்ராஹிம் உறுதியாக இருப்பதாக ஃபஹ்மி கூறினார்.
“ஆகவே, தலைமைச் செயலாளர் 2020ஆம் ஆண்டு சுற்றறிக்கையை மறுபரிசீலனை செய்து, இன்றைய அமைச்சரவைக் கூட்டத்தின் முடிவைத் தொடர்ந்து மேம்பாடுகளைச் செய்வார்.
இதன் மூலம், சுகாதாரம் மற்றும் பாதுகாப்பு உட்பட காவல் நிலையங்கள் போன்ற சில முன்னணி சேவைகளுக்கு அந்த சுற்றறிக்கையின் கீழ் விலக்கு அளிக்கப்படும்.”
“இது தலைமைச் செயலாளராலும் அவரது அலுவலகத்தாலும் கவனமாகப் பரிசீலிக்கப்படும். ஒரு புதிய அறிக்கையும் மேம்படுத்தப்பட்ட சுற்றறிக்கையும் விரைவில் எதிர்பார்க்கலாம்,” என்று அவர் இன்று அமைச்சரவைக் கூட்டத்திற்குப் பிறகு நாடாளுமன்றத்தில் நடைபெற்ற செய்தியாளர் சந்திப்பில் தெரிவித்தார்.
ஜாசின் காவல் தலைமையகத்திற்கு திங்கட்கிழமை ஒரு பெண் நுழைய மறுக்கப்பட்டதைத் தொடர்ந்து இந்த அறிவிப்பு வந்துள்ளது. அவரது உடை அரசு வளாகத்திற்குப் பொருத்தமற்றதாகக் கருதப்பட்டது. அவர் முழங்காலுக்கு சற்று மேலே இருந்த பாவாடை அணிந்திருந்ததாகக் கூறப்படுகிறது.