கடந்த இரு தசாப்தங்களாகத் தனது அசாத்திய விளையாட்டுத் திறமையால், ரசிகர்களைக் கட்டிப் போட்டிருந்த, காற்பந்து ஜாம்பவான் லியோனல் மெஸ்ஸி (Lionel Messi), செவ்வாய்க்கிழமை (அக் 6) புவெனஸ் அயர்ஸில் (Buenos Aires) உள்ள தனது சொந்த நாட்டு ரசிகர்கள் முன்னிலையில் தனது அனைத்துலக காற்பந்து வாழ்க்கைக்கு உணர்ச்சிப்பூர்வமாக விடை கொடுத்தார் .
பெனின் (Benin) அணிக்கு எதிராக நடைபெற்ற தனது கடைசி அர்ஜென்டினா போட்டியில், மெஸ்ஸி ஒரு கோல் அடித்ததோடு, மற்ற இரு கோல்களுக்கு வழிவகுத்து , தனது அணியை 3-0 என்ற கோல் கணக்கில் மீண்டும் ஒரு முறை வெற்றிக்கு வித்திட்டார்.
மெஸ்ஸி இனி ஒருபோதும் நீலம் மற்றும் வெள்ளை நிறத்திலான 10-ஆம் எண் ஜெர்சியை அணியமாட்டார் என்பதால், அந்தப் போட்டி முழுவதும் பெரும் உணர்ச்சிப் பெருக்குடன் காணப்பட்டது.
21 ஆண்டுகள் தனது நீண்ட அனைத்துலக காற்பந்தாட்ட வாழ்க்கையில், இரு கோப்பா அமெரிக்கா (Copa América) பட்டங்கள் மற்றும் ஒரு ஃபிஃபா (FIFA) உலகக் கிண்ணம் ஆகியவற்றை வென்று கொடுத்து விடைபெற்றுள்ளார் மெஸ்ஸி.
முன்னதாக, போட்டியின் 71-ஆவது நிமிடத்தில் 39 வயது மெஸ்சி பெனால்டி மூலம் பந்தை வலைக்குள் செலுத்தியபோது, மைதானம் முழுவதும் “மெஸ்ஸி, மெஸ்ஸி” என்ற முழக்கங்கள் எதிரொலித்தன.
போட்டி முடிந்த பிறகு கூட்டத்தினரிடையே உரையாற்றிய அவர், அர்ஜென்டினா தேசிய அணிக்காக விளையாடுவதிலிருந்து ஓய்வு பெறுவதை “எனது வாழ்க்கையின் மிகச் சோகமான நாள்” என்று குறிப்பிட்டார்.
“உங்கள் அனைவருக்கும் விடைபெறுகிறேன். நான் உங்களை மிகவும் நினைத்து வருந்தச் செய்வேன்; தேசிய அணியின் வண்ணங்களைத் தற்காத்து விளையாடியதை நான் நினைத்து ஏங்குவேன்.
ஆனால், இனி நானும் உங்களைப் போல ஒருவனாக இங்கிருந்தபடியே இந்த வீரர்களுக்கும், அவர்களுக்குப் பின்னால் வரும் அனைவருக்கும் ஆதரவளிப்பேன்.
எப்போதும், எந்நாளும் நாம் இணைந்திருப்போம். நான் உங்களை நேசிக்கிறேன் என்று கூற விரும்புகிறேன்,” என்று உணர்ச்சிப் பெருக்கோடு விடைபெற்றார் மெஸ்ஸி.