கோலாலம்பூர் அக் 10-
2027ஆம் ஆண்டுக்கான MADANI வரவு செலவுத் திட்டம், மாண்புமிகு பிரதமர் டத்தோ ஸ்ரீ அன்வார் இப்ராஹிம் அவர்களின் அணுகுமுறையைத் தெளிவாக வெளிப்படுத்துகிறது. குறுகிய கால நிவாரண உதவிகளுக்கு மட்டும் முக்கியத்துவம் அளிக்காமல், கல்வி, சுகாதாரம், திறன் மேம்பாடு மற்றும் வேலைவாய்ப்புகள் மூலம் நாட்டின் பொருளாதார அடித்தளத்தையும் வலுப்படுத்துவதில் இந்த வரவு செலவுத் திட்டம் கவனம் செலுத்துகிறது.
வாழ்க்கைச் செலவு அதிகரிப்பால் மக்கள் எதிர்கொள்ளும் சுமையைக் குறைப்பது அரசாங்கத்தின் முக்கிய முன்னுரிமையாகத் தொடர்கிறது என்பதை STR மற்றும் SARA திட்டங்களுக்காக ஒதுக்கப்பட்டுள்ள RM16 பில்லியன் தெளிவாக எடுத்துக்காட்டுகிறது. அதேவேளையில், மக்களின் வருமானத்தை உயர்த்துவதற்கும் பொருளாதார வாய்ப்புகளை விரிவுபடுத்துவதற்கும் நாம் தொடர்ந்து முக்கியத்துவம் அளிக்க வேண்டும். நாட்டின் பொருளாதாரத்தை நிர்வகிப்பதில் இத்தகைய சமநிலையே அவசியமாகும்.
சுகாதார அமைச்சுக்கான ஒதுக்கீடு RM47.7 பில்லியனாக அதிகரிக்கப்பட்டிருப்பதையும், 2027ஆம் ஆண்டில் 9,000க்கும் மேற்பட்ட ஒப்பந்த மருத்துவர்களுக்கு நிரந்தரப் பணியிடங்கள் வழங்கப்படவிருப்பதையும் நான் வரவேற்கிறேன். இந்த நடவடிக்கை சுகாதாரப் பணியாளர்களின் நலனைப் பாதுகாப்பதுடன், பொதுமக்களுக்கு வழங்கப்படும் சுகாதாரச் சேவைகளின் தரத்தையும் மேம்படுத்துவதற்கு முக்கியமானதாகும்.
இந்தியச் சமூகத்தைப் பொறுத்தவரையில், குறிப்பிட்டுச் சொல்ல வேண்டிய பல முக்கிய அறிவிப்புகள் இடம்பெற்றுள்ளன. MITRA அமைப்புக்கு RM150 மில்லியன் ஒதுக்கீடு, TEKUN மற்றும் AIM அமைப்புகள் மூலம் RM150 மில்லியன் நிதியுதவி வசதிகள், அத்துடன் தமிழ்ப்பள்ளிகளின் (SJKT) பராமரிப்புக்காக RM50 மில்லியன் ஒதுக்கீடு என, நிதி ஒதுக்கீடுகள் மற்றும் நிதியுதவி வசதிகளை உள்ளடக்கிய மொத்தம் RM350 மில்லியன் அறிவிக்கப்பட்டுள்ளது.
இந்த அறிவிப்புகள், குறிப்பாக திறன் பயிற்சி, சிறந்த வருமானம் தரும் வேலைவாய்ப்புகள் மற்றும் சிறு தொழில்முனைவோர் வளர்ச்சி ஆகியவற்றின் மூலம் இந்தியச் சமூகத்தின் பொருளாதார நிலையை வலுப்படுத்துவதற்கான ஒரு வாய்ப்பாக நான் கருதுகிறேன்.
இருப்பினும், இந்தத் திட்டங்கள் அனைவரையும் சென்றடையும் வகையில் முழுமையாகச் செயல்படுத்தப்படுவதை நாம் உறுதிப்படுத்த வேண்டும். MITRA அமைப்பின் வெற்றியை அது நடத்தும் நிகழ்ச்சிகளின் எண்ணிக்கையைக் கொண்டு மட்டும் அளவிட முடியாது. அதன் மூலம் எத்தனை இளைஞர்கள் வேலைவாய்ப்பைப் பெற்றுள்ளனர், எத்தனை பேரின் வருமானம் உயர்ந்துள்ளது என்பவையே உண்மையான வெற்றிக்கான அளவுகோல்களாகும். அதேபோன்று, தொழில்முனைவோருக்கான நிதியுதவிகளும் உண்மையில் தேவைப்படுவோருக்குக் கிடைக்கக்கூடியதாக இருக்க வேண்டும்.
லடாங் பாமோல் தமிழ்ப்பள்ளிக்குப் பதிலாகப் புதிய பள்ளிக் கட்டடம் அமைப்பதற்கான அறிவிப்பு, சீனப் புதுக் கிராமங்களின் உட்கட்டமைப்பு மேம்பாட்டிற்காக RM100 மில்லியனுக்கும் அதிகமான ஒதுக்கீடு மற்றும் பதிவு செய்யப்பட்ட வழிபாட்டுத் தலங்களின் பராமரிப்புக்காக RM80 மில்லியன் ஒதுக்கீடு ஆகியவையும் பல்வேறு சமூகங்களின் தேவைகளுக்கு அரசாங்கம் கவனம் செலுத்துவதைப் பிரதிபலிக்கின்றன.
பிரதமர் அவர்கள் தனது வரவு செலவுத் திட்ட உரையில் திருக்குறள் மற்றும் திருவள்ளுவர் ஆகியவற்றுக்கு அங்கீகாரம் வழங்கியதை நான் தனிப்பட்ட முறையில் பாராட்டுகிறேன். ஒவ்வொரு சமூகத்தின் மொழி, பண்பாடு மற்றும் பாரம்பரியத்தை மதிப்பது, நாட்டின் ஒற்றுமையை வலுப்படுத்துவதில் முக்கியப் பங்கு வகிக்கிறது.
கல்வித் துறையைப் பொறுத்தவரையில், ஆறாம் படிவத்தில் (Form Six) கல்வி பயிலும் 90,000 மாணவர்களுக்கு RM2,500 வாழ்க்கைச் செலவுக் கொடுப்பனவு வழங்கப்படுவது குறிப்பிடத்தக்க முன்னேற்றமாகும். STPM கல்விப் பாதையைத் தேர்ந்தெடுக்கும் மாணவர்களுக்கு நியாயமான ஆதரவை வழங்குவதில் இது ஒரு முக்கியமான படியாகும்.
அரசுப் பணியாற்றும் பெண்களுக்கான மகப்பேறு விடுப்புத் தகுதி, மொத்தப் பணிக்காலத்தில் 360 நாட்களிலிருந்து 490 நாட்களாக அதிகரிக்கப்படுவதையும் நான் வரவேற்கிறேன். ஒவ்வொரு பிரசவத்திற்கும் அதிகபட்சமாக 98 நாட்கள் விடுப்பு வழங்கப்படும் இந்த நடவடிக்கை, ஒரு பெண்ணாகவும் பணிபுரியும் தாயாகவும் குடும்பப் பொறுப்புகளையும் தொழில் வாழ்க்கையையும் சமநிலைப்படுத்த வேண்டிய தேவையை அங்கீகரிப்பதாக நான் கருதுகிறேன்.
KEADILAN கட்சியைப் பொறுத்தவரையில், பொருளாதாரச் சீர்திருத்தங்கள் சமூக நீதியுடன் இணைந்து முன்னேற வேண்டும். பொருளாதார வளர்ச்சி என்பது மக்களின் வாழ்க்கைத் தர உயர்வு, வேலைவாய்ப்புகள் அதிகரிப்பு, கல்விக்கான சமமான வாய்ப்புகள் மற்றும் அடிப்படைச் சேவைகளை நியாயமான முறையில் அணுகும் வசதி ஆகியவற்றில் பிரதிபலிக்க வேண்டும்.
ஒரு சிறந்த வரவு செலவுத் திட்டத்தை அதன் ஒதுக்கீடுகளின் மொத்தத் தொகையை மட்டும் கொண்டு மதிப்பிட முடியாது. அந்த ஒதுக்கீடுகள் எவ்வளவு திறம்படச் செயல்படுத்தப்படுகின்றன என்பதே முக்கியம். அறிவிக்கப்பட்ட நன்மைகள் உண்மையில் மக்களைச் சென்றடைவதை ஒவ்வொரு அமைச்சும் அரசாங்க அமைப்பும் உறுதிப்படுத்த வேண்டும்.
நாட்டின் பொருளாதாரச் சீர்திருத்தப் பயணத்தைத் தொடர்ந்து முன்னெடுப்பதுடன், அரசாங்கத்தின் சமூகப் பொறுப்புகளையும் புறக்கணிக்காமல் வழிநடத்தி வரும் மாண்புமிகு பிரதமர் டத்தோ ஸ்ரீ அன்வார் இப்ராஹிம் அவர்களுக்கு எனது நன்றியையும் பாராட்டுகளையும் தெரிவித்துக்கொள்கிறேன்.
இன்று மக்களுக்கு உதவுவது முக்கியம். எதிர்காலத்தில் அவர்கள் தங்களது பொருளாதார வலிமையைத் தாங்களே உருவாக்கிக்கொள்ளும் ஆற்றலை வளர்ப்பது அதைவிட முக்கியமானது.
சிவமலர் கணபதி
துணைப் பொதுச் செயலாளர்
மத்திய தலைமை மன்ற உறுப்பினர் (MPP)
பார்ட்டி கெஅடிலான் ராக்யாட் (KEADILAN)