நீலாய், ஜூலை 20-
நீலாய் சட்டமன்றத் தொகுதியில் பெர்சத்து கட்சியின் சார்பில் எண் 5-இல் போட்டியிடும் டத்தோ வி. சரவணக்குமார், தாம் சட்டமன்ற உறுப்பினராக வெற்றி பெற்றால் நீலாயில் அரசு மருத்துவமனை அமைப்பதற்கான நடவடிக்கையை முன்னெடுப்பதாக உறுதியளித்தார்.
நீலாய் மக்களின் முக்கியத் தேவைகளில் ஒன்றாக மருத்துவமனை இருப்பதாகக் குறிப்பிட்ட அவர், பல பல்கலைக்கழகங்கள், தொழிற்சாலைகள் மற்றும் மக்கள் தொகை அதிகரித்து வரும் பகுதியாக இருந்தாலும், இதுவரை நீலாயில் அரசு மருத்துவமனை இல்லாதது மக்களுக்கு பெரும் சிரமத்தை ஏற்படுத்தி வருவதாக தெரிவித்தார்.
டிஎஸ்கே அரசு சாரா அமைப்பின் மூலம் நீண்டகாலமாக மக்கள் சேவையில் ஈடுபட்டு வந்த அவர், அந்தச் சேவையை மேலும் விரிவுபடுத்தும் நோக்கில் பெர்சத்து கட்சியில் இணைந்து தற்போது நீலாய் சட்டமன்றத் தொகுதியில் போட்டியிடுகிறார்.
நீலாய் பழைய பட்டணப் பகுதியில் மழைக்காலத்தில் கடுமையான வெள்ளப் பிரச்சினை ஏற்படுவதாகவும், இதுதொடர்பாக பலமுறை அதிகாரிகளிடம் புகார் அளித்தும் நிரந்தரத் தீர்வு கிடைக்கவில்லை. அந்த வெள்ளப் பிரச்சினைக்கு நிரந்தரத் தீர்வு காண முன்னுரிமை அளிக்கப்படும்.
மேலும், பத்தாங் பெனாரிலிருந்து நீலாய் பட்டணத்திற்குச் செல்லும் சாலை பாதுகாப்பற்ற நிலையில் இருப்பதால் பல விபத்துகளும் உயிரிழப்புகளும் நிகழ்ந்துள்ளதாக குறிப்பிட்ட அவர், அந்தச் சாலையின் பாதுகாப்பை மேம்படுத்த நடவடிக்கை எடுக்கப்படும் என்றார்.
நீலாய் 3 பகுதியில் சட்டவிரோத குடியேறிகள் அதிகரித்திருப்பது அப்பகுதியின் வளர்ச்சியை பாதித்துள்ளதாகவும், முன்பு பரபரப்பான வர்த்தக மையமாக விளங்கிய அந்தப் பகுதி தற்போது தனது அடையாளத்தை இழந்து வருவது கவலையளிக்கிறது.
அத்துடன், நீலாயில் பொது போக்குவரத்து வசதிகள் போதுமானதாக இல்லாததோடு, வேலைவாய்ப்புகளும் குறைவாக உள்ளது. அடிப்படை வசதிகள் இருந்தும் இப்பகுதி எதிர்பார்த்த அளவுக்கு மேம்பாடு அடையவில்லை.
இந்த மாநிலத் தேர்தலில் மக்களிடம் மாற்றத்திற்கான வாய்ப்பை வழங்குமாறு கேட்டுக்கொண்ட டத்தோ சரவணக்குமார், பெர்சத்து அணிக்கு ஆதரவு கிடைத்தால் நீலாய் மக்களின் நீண்டகாலப் பிரச்சினைகளுக்கு தீர்வு காணும் பணிகளை முன்னெடுப்போம் என உறுதியளித்தார்.
நீலாய் சட்டமன்றத் தொகுதியில் இந்த முறை ஐந்து முனைப் போட்டி நிலவுகிறது என்பது குறிப்பிடத்தக்கது.